Is me Dulce-me, how yu du? Anybody go a di Reggae Soca Awards? First mi

ear say dem did have red karpet an  di place only fulla pure chelebitties. From wha mi ear, dem give out di awards wid a big black screen behind di awardees an only when di ban a go play yu si a pretti tropica settin bacgroun. Correc mi if mi wrong, yu wouldn prefer to have di pretti backgroun when di awards a give out?  Another ting wha mi ear, is di whole place look blah, not even two flowers, or ribbon, nuttin, jus soso suh. Even dough dem carri it go a di big fanci place, it neva a say nuttin. Yu feel mi? It was suppose to be sumptin similar to di grammi inna ollyhood, but dem have a looong way fi go cause dis is not even a distance cusin to di real grammi. Anyway dem a try.

                  ********************

Mi ear say, Elizabeth Taylor have alzheimers? That would be calamitoshus, cause she could'nt member the ole eap a husband dem wha she ave. From wha mi ear she a deny iit  She draw up ar will aready cause she expec death  any daay now and you couldn guess a who a go get di money? Di aids people dem, till all ar daughter vex cause dem nah get as much money as dem tink dem woulda get. Dat dont soun like alzimers to me. Anyway mi hope dat she can still memeber at least one a di husban dem. Mi wi keep yu posted.

                        *********************

Mi ear say Beeni man an Bounti fall out again. Dis time mi ear say

Bounty  say im tired and fed up of Beanie always a thro word pon stage, an inna im song dem. Accordin to Bounti it get personal, cause is one ting seh Beeni deh wid  Bounty ex girl but turn roun an say Bounty couldnt get ar pregnant. Dis mek di warlord vex. Beenie goh engage Bounti ex girl yuh nuh dat alone help mek Bounti treaten Beeni seh if im keep it up im going end up like Tupac or Biggi Smalls. It soun seriouser. Dem is two good djs inna dem own way, ave dem own fan club, so dem need to wouk dis out an get along. Speakin of Beenie, mi ear say im inna di hospital but mi nuh know fi wha. MI going investicate an mek yu know, cause mi wan know if im a stress fram Bounti threats or im sick fram sumptin else.

                    ***********************

Mi ear say, 50 cents, di big american rapper did dey a yard two weeks

ago and guess wha? Mi ear say im married a yaad. Mi ear say a di Half Moon Bay Hotel dem see im and im cum dung quietly fi married. I really dont know who im married to, but mi ear say all Busta Rymees did deh a di weddin tu. mI ear say im a go deh pon Sumfest but mi noh tink a dat im cum fah, mi ave a feiln im meet a boonoonos yaadi gal, cause fram wha mi ear im always deh a yaad!! MI wi keep yu posted on dat one.

A so mi get it, so mi sell it. Talk to yu nex time